Ku e enkuentro di informashon inaugural ku a tuma lugá na Kòrsou, e partnernan a marka komienso di un kapítulo nobo pa e terminal na Bullenbaai i e fasilidatnan na Emmstad. Esaki, djis algún dia despues ku a tuma lugá e transishon ofishal di nan tim di maneho i operashon pa e kompania energétiko. E enkuentro por a konta ku presensia di más ku 150 partisipante, kual ta simbolisá e kompromiso entre e partnernan pa ku e empleadonan di CRU i alabes e futuro duradero di e áreanan stratégiko na Bullenbaai i Emmastad.
Durante e enkuentro un bon biní kaluroso a keda ekstendé na tur empleado, ku awor ta forma parti di e famia Oryx. E momentu signifikante aki ta representá un transishon operashonal i unifikashon di e vishon kompartí pa loke ta trata kresementu, inovashon i sostenibilidat.
Señor Ghanim Al Saad, Presidente di Oryx Group, a asistí e evento via Zoom. Pa medio di esaki e la re-afirmá e kompromiso di e kompania pa proveé operashon riba nivel haltu i invershon den talentonan lokal. Den su diskurso e la enfatisá e importansia di traha huntu komo tim pa logra modernisá i optimalisá operashon, i na mes momentu mantené e standartnan más haltu pa loke ta trata medio-ambiente, aspektonan sosial i seguridat.
“Huntu, nos lo konstruí un futuro briyante pa e fasilidatnan di Bullenbaai i Emmastad, i nos lo pone prioridat riba bienestar, desaroyo i éksito pa tur miembro di Oryx”, señor Al Saad a bisa.
Señor Patrick Newton di 2BAYS a inisiá e enkuentro splikando e progreso ku a logra e último lunanan. Señor David de Haseth, Direktor General di CRU, huntu ku Ryan Breedijk, Direktor di Maneho pa Oryx Midstream, a presentá e plannan interesante ku ta pendiente pa re-akstivashon di operashonnan na Bullenbaai i Emmastad. Tambe nan a presentá e aspektonan komersial i den esakinan a enfatisá e importansia di e impakto pa tantu e medio-ambiente komo e área sosial.
Personal di CRU a partisipá aktivamente pa medio di preguntanan ku nan a trese dilanti, hasiendo e seshon tantu dinámiko komo produktivo, mientras ku Oryx a presentá informashon tokante e transishon, su kompromiso pa loke ta trata sostenibilidat, krea un impakto positivo i guía e operashon riba nivel di ekselensia i ku integridat na momentu ku inisá e plannan pa reaktivá e fasilidatnan klave na Kòrsou.
Tur partisipante a indiká di ta di akuerdo pa kontinuá ku diálogo i interkambio, mientras ku ta traha pa asegurá éksito di e start operashonal, kual lo keda realisiá ku sosten di e famia nobo di Oryx.
