Willemstad, Kòrsou, 16 di Sèptember 2024 – Trabounan di preparashon ta sigui progresá na e fasilidatnan na Bullenbaai i Emmastad. Esaki a keda verifiká dor di e delegashon di Oryx Midstream, liderá dor di su presidente, señor Ghanim Saad Al-Kuwari, durante un bishita na e sentro operashonal ofishal na Bullenbaai riba djasabra ùltimo 14 di sèptèmber 2024.
E tim di RdK a fungi komo anfrition i señor Ghanim i su delegashon a skucha atentamente na momentu ku nan a risibí splikashonnan ekstenso tokante e fasilidatnan, inkluso tokante e kondishonnan i kapasidat di e tankinan di almasenahe, e mantenshon rekerí i e estado aktual di e seis jètinan.
Sr. Ghanim a trese diferente preguntanan klave dilanti, enfokando riba aspektonan relatá na medio-ambiente, por ehèmpel e posibilidat pa baha òf eliminá emishon for di e mashinnan. Tambe e la hasi preguntanan tokante aspektonan di seguridat, manera e frekuensia di insidentenan, riba kua e la keda informá ku insidentenan ta sumamente inkomun.
E trabounan pendiente ta kai bou di e palabrashon di hür firmá riba 1 di yüli 2024, entre Refineria di Kòrsou, kual ta pertenesé na Gobièrnu di Kòrsou, i Oryx Midstream.
Na momentu ku e operashon kuminsá kana según 100% kapabilidat, e terminal na Bullenbaai huntu ku e fasilidatnan na Emmastad, lo proveé un infrastruktura ideal pa almasenahe, i meskla i distribushon di krudo, kual lo resultá den un gran sosten pa e kadena di suministro regional i internashonal.
“Nos ta dependé di e abilidatnan lokal pa por re-aktivá e fasilidatnan. Nos meta ta pa sostené e tim lokal i krea un situashon seif, ku ta responsabel i fortifiká pa téknologia, p’asina asegurá ku ta mantené e standartnan más haltu pa loke ta trata seguridat i efisiensia na tur nivel”, señor Ghanim a splika.
